अर्घाखाँचीको सन्धिखर्क नगरपालिकाको साना सहरी खानेपानी सरसफाइ आयोजनामा नेकपा एमाले र नेपाली कांगेसको गठबन्धन पराजित भएको छ ।
बिहीबार भएको निर्वाचनमा एमाले–कांग्रेसको गठबन्धनका साझा उम्मेदवार युवराज खत्रीलाई हराउँदै स्वतन्त्र उम्मेदवार बाबुराम भुसाल विजयी भएका हुन् । भुसाललाई रास्वपाको समर्थनसमेत थियो ।
केही बेरअघि सार्वजनिक भएको अन्तिम मत परिणामअनुसार भुसालले ५६३ मत ल्याएर अध्यक्षमा निर्वाचित भएका हुन् ।
एमाले-कांग्रेस गठबन्धनबाट उम्मेदवार बनेका खत्रीले भने ४४३ मत मात्र पाए ।
यस्तै वरिष्ठ उपाध्यक्षमा पनि स्वतन्त्र समूहबाट उम्मेदवार बनेका वेदराज घिमिरेले बाजी मारे ।
उपाध्यक्ष र सचिवमा भने गठबन्धनका उम्मेदवार विजयी भए । भेषबहादुर क्षेत्री उपाध्यमा विजयी भए भने गोपाल पौडेल सचिवमा । तर कोषाध्यक्षमा भने स्वतन्त्र उम्मेदवार सरिता महत क्षेत्री विजयी भइन् । सहसचिवमा कल्पना पोख्रेल (गठबन्धन) विजयी भइन् ।
यसअघि कांग्रेस जिल्ला कार्य समितिले गठबन्धनका उम्मेदकारलाई मत हाल्न ह्वीप जारी गरेको थियो ।
